Komisioni për Bujqësinë, Ushqimin dhe Zhvillimin Rural miratoi dy projektligje
TIRANË, 7 korrik /ATSH/ Komisioni për Bujqësinë, Ushqimin dhe Zhvillimin Rural zhvilloi sot mbledhjen e radhës, ku shqyrtoi dy projektligje.
Në fillim të mbledhjes, komisioni shqyrtoi projektligjin “Për grupimet ekonomike me interes evropian”, nismë e deputetes Milva Ekonomi dhe e Këshillit të Ministrave. I ftuar ishte edhe zëvendësministri i Ekonomisë dhe Inovacionit Enkelejd Musabelliu.
Gjatë prezantimit, Ekonomi paraqiti qëllimet e projektligjit, i cili synon krijimin e kuadrit ligjor për funksionimin e grupimeve ekonomike me interes evropian, në përputhje me standardet e Bashkimit Evropian. po ashtu, diskutimet u përqendruan në lehtësimin e bashkëpunimit ndërmjet subjekteve ekonomike, rritjen e konkurrueshmërisë dhe krijimin e mundësive të reja për zhvillimin e aktivitetit ekonomik, përfshirë sektorin bujqësor dhe agro-ushqimor.
Pas diskutimeve, anëtarët e komisionit e miratuan projektligjin në parim, nen për nen dhe në tërësi.
Në vijim, komisioni shqyrtoi projektligjin “Për dëftesat tregtare mbi produktet bujqësore”, ku të ftuar ishin zëvendësministri i Bujqësisë dhe Zhvillimit Rural Fatmir Guri dhe stafi shoqërues.
Gjatë diskutimeve u theksua se projektligji synon krijimin e një mekanizmi modern për tregtimin dhe financimin e produkteve bujqësore, duke rritur sigurinë juridike të transaksioneve, përmirësuar aksesin e fermerëve në financim dhe nxitur zhvillimin e tregut bujqësor. Anëtarët e komisionit diskutuan gjithashtu ndikimin që pritet të ketë ky instrument në rritjen e formalizmit të sektorit dhe forcimin e zinxhirit të vlerës së produkteve bujqësore.
Pas diskutimeve, anëtarët e komisionit e miratuan projektligjin në parim, nen për nen dhe në tërësi.
/e.xh/j.p/