Kori “Lira” rikthehet në skenë me koncertin tradicional, këngët tradicionale dhe serenatat krijojnë atmosferë të ngrohtë në Korçë

Si çdo fundvit, kori “Lira” u rikthye në skenë me koncertin tradicional, duke i dhuruar publikut korçar një mbrëmje festive të mbushur me tinguj dhe emocione. Me një repertor të përzgjedhur këngësh tradicionale, serenatash dhe pjesësh lirike e popullore, koncerti u shndërrua në një kartolinë muzikore për festat, duke krijuar një atmosferë të ngrohtë dhe familjare.Kori “Lira”, mbajtës i titullit “Nderi i Kombit”, dëshmoi edhe një herë pasurinë e repertorit të tij me mbi 100 këngë, të interpretuara në formë klasike.

Dirigjenti Pandi Bello theksoi në fjalën e tij se ky koncert është një mënyrë për të ruajtur dhe përcjellë trashëgiminë kulturore shqiptare nga brezi në brez, ndërsa këngëtari i korit, Llazi Balashi, u shpreh se çdo interpretim vjen si një homazh për publikun dhe traditën muzikore korçare.

Mbrëmja u shoqërua me duartrokitje të vazhdueshme nga publiku, i cili vlerësoi nivelin artistik dhe emocionin e përcjellë nga kori “Lira”, duke e konfirmuar këtë koncert si një nga momentet më të veçanta kulturore të fundvitit në qytet.