Kumbaro: Zgjerojmë programin dhe orarin e programit "Pas Shkolle", 5.5 milionë euro financim me buxhetin e ri - ATSH -
TIRANË, 2 nëntor /ATSH/ Ministrja e Arsimit, Mirela Kumbaro informoi sot se është hapur thirrja e tretë për trajnues të programit “Pas Shkolle”, si kërkesë e shtuar për përfshirjen e më shumë nxënësve e shkollave në program, por edhe e prindërve për zgjatjen e orarit deri në orën 17.00, për vitin e ardhshëm.
Kumbaro u bëri thirrje gjithë mësuesve në sistem, atyre në listë pritje, mësuesve në pension dhe artizanëve e profesionistëve të fushave të artit të aplikojnë për të kontribuar në program.
“Është një program për të cilin janë rritur shumë kërkesat. Ne e nisëm me 408 shkolla në të gjithë Shqipërinë, por kemi kërkesa edhe për më shumë shkolla dhe sidomos për të zgjatur orarin e qëndrimit deri në 17.00 që përkon edhe me oraret e mbarimit të punës për prindërit. Që ne ta bëjmë realitet, na duhen më shumë burime njerëzore dhe kjo është arsyeja pse po e hapim për të tretën herë thirrjen për trajnerë, përkundrejt një shpërblimi prej 1000 lekë/ora. Me buxhetin e vitit 2027 kemi siguruar gjithë financimin e nevojshëm, plot 5.5 milionë euro dedikuar programit “Pas Shkolle”, tha Kumbaro.
Ministrja Kumbaro njoftoi edhe zgjerimin e këtij programi me module dhe klube të reja.
Klubi i shkencës dhe ai i gjuhëve të huaja u shtohen klubeve ekzistuese të programit si “Bëjmë detyrat e shtëpisë”, klubi i teatrit, kërcimit, artit pamor dhe zejeve, prandaj thirrja vlen edhe për mësuesit e lëndëve STEM dhe gjuhëve të huaja.
“Të gjithë fëmijëve të arsimit parauniversitar u japim mundësinë për të ndenjur më gjatë në shkollë, për të bërë detyrat e shtëpisë, por edhe për të bërë aktivitete të tjera, të çlirëta, edukative dhe ju japin mundësinë të krijojnë marrëdhënie me njërit-tjetrin. Është e nevojshme të zgjerojmë programin me module të reja; të shkencës dhe të gjuhëve të huaja do të jenë modulet e reja”, njoftoi ministrja.
Thirrja e shpallur në faqen zyrtare të Agjencisë Kombëtare të Arsimit Parauniversitar do të qëndrojë e hapur dy javë për të gjithë mësuesit dhe trajnuesit që plotësojnë kriteret.
/k.s/j.p/
Sipas Ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar Agjencinë Telegrafike Shqiptare.