Mbërrijnë në Gjykatën e Fierit të arrestuarit për skemën e dyshuar të tjetërsimit të pronave në Seman

Ertis Shehu, ish-drejtori i Kadastrës Bardhyl Kapaj, juristi Pirro Çela dhe biznesmeni Kastriot Hasko kanë mbërritur në Gjykatën e Fierit, ku do të zhvillohet seanca për vlerësimin e masave të sigurisë ndaj tyre, në kuadër të hetimeve për një tjetër skemë të dyshuar të tjetërsimit të pronave në zonën e Semanit.

Sipas Prokurorisë, biznesmeni Kastriot Hasko dyshohet se ka përdorur dy vendime të falsifikuara të Komisionit të Kthimit dhe Kompensimit të Pronave për të regjistruar toka në bashkëpronësi me katër persona të tjerë dhe më pas për t’ua shitur ato dy shoqërive.

Në kuadër të hetimeve janë arrestuar Ertis Shehu, Kastriot Hasko, ish-drejtori i Kadastrës Bardhyl Kapaj dhe juristi Pirro Çela.

Prokuroria ka sekuestruar 76 pasuri me një sipërfaqe totale prej 1,143 hektarësh, si dhe 150 mijë euro.

Kastriot Hasko konsiderohet nga organi i akuzës si përfituesi i tokave në Seman, ndërsa hetimet vijojnë për të dokumentuar rolin e secilit prej personave të arrestuar në skemën e dyshuar.

Gjykata e Fierit pritet të vlerësojë masat e sigurisë për katër të arrestuarit.