Mbyllja e Ngushticës së Hormuzit/ Mediat ndërkombëtare raportojnë për sulme ndaj anijeve nga forcat iraniane

Një anije cisternë në Ngushticën e Hormuzit thotë se është qëlluar nga dy anije luftarake të operuara nga Trupat e Gardës Revolucionare Islamike të Iranit, sipas Operacioneve Tregtare Detare të Mbretërisë së Bashkuar (UKMTO).

Incidenti ndodhi 20 milje detare në verilindje të Omanit, ndërsa ekuipazhi raportohet se janë të sigurtë.

Ndërkohë, edhe dy anije të tjera tregtare thonë se u goditën me armë zjarri ndërsa përpiqeshin të kalonin ngushticën, thanë tre burime për agjencinë e lajmeve Reuters.

Ushtria e Iranit mbylli sërish sot Ngushticën e Hormuzit

Ushtria iraniane ka njoftuar se po rifillon kontrollin e Ngushticës së Hormuzit, sipas mediave shtetërore të Iranit.

Agjencia e lajmeve Fars, e lidhur me Gardën Revolucionare Islamike (IRGC), Agjencia e Lajmeve të Studentëve Iranianë dhe transmetuesi shtetëror IRIB raportojnë për një deklaratë të IRGC-së, sipas së cilës ngushtica do të kthehet “në gjendjen e mëparshme”, me forcat e armatosura që do të kontrollojnë zonën.

BBC shkruan se më herët janë parë disa anije që kalonin nëpër këtë rrugë detare, por ende nuk është e qartë sa trafik detar ka arritur të kalojë përmes këtij korridori kritik për transportin ndërkombëtar.

Në deklaratën e saj, ushtria iraniane akuzon Shtetet e Bashkuara për “pirateri”, duke thënë se “bllokada e ashtuquajtur” përbën grabitje detare. Irani më parë kishte deklaruar se do ta mbyllte ngushticën nëse SHBA-të do të vazhdonin bllokadën ndaj porteve të tij.