Ngjyrat e vjeshtës pikturojnë Malin e Nemërçkës në Përmet
TIRANË, 28 tetor /ATSH/ Kryeministri Edi Rama ka ndarë sot pamje mahnitëse nga Mali i Nëmërçkës, që shfaqet në ngjyrat e vjeshtës në zemër të Jugut të Shqipërisë.
Mali i Nemërçkës, po shnddërrohet në një prej destinacioneve të preferuara të turizmit malor vitet e fundit.
“Pamje vjeshte nga Mali i Nemërçkës, në zemër të Jugut të Shqipërisë, mes qetësisë së Përmetit dhe hijeshisë së Vjosës”, shkruan Rama, teksa ka publikuar videon në rrjetet sociale.
Mali i Nemërçkës është pjesë e një vargmali mes Përmetit dhe Gjirokastrës. Nëmërçka ka një shpat të mprehtë malor që bie direkt në Luginën e Vjosës. Maja më e lartë është Maja e Papingut, ose Maja e Dritës, 2485 metra, që është dhe pika më e lartë e gjithë vargmalit Trebeshinë-Dhëmbel-Nemërçkë. Të tjera maja të këtij mali janë: Maja e Gatakut, Maja e Qesarit dhe Maja e Poliçanit.
Turizmi malor në Shqipëri vlerësohet si një nga resurset turistike më të mëdha të vendit, krahas bregdetit, duke tërhequr turistë të huaj dhe vendas.
Përmirësimi i infrastrukturës, sigurisë dhe investimet në këtë sektor po rriten dita-ditës, duke shtuar dhe të ardhurat për banorët dhe operatorët turistikë.
Turizmi malor jo vetëm po e zgjat sezonin në vendin tonë, por edhe po diversifikon ofertën e atraksioneve për turistët vendas e të huaj.
/r.e/