Një ditë më parë iu vendos tritol në banesë, arrestohet i shumëkërkuari Ylli Zalla
Një ditë pasi banesa e tij në Fushë-Krujë u bë shënjestër e një sulmi me tritol, i shumëkërkuari Ylli Zalla është arrestuar nga Policia e Shtetit në kuadër të një operacioni të zhvilluar në Krujë.
Aksioni, i koduar “Fundi i Arratisë”, u finalizua nga Forcat Speciale RENEA, Drejtoria e Forcës së Posaçme Operacionale, strukturat operacionale të DVP Tiranë dhe Komisariati i Policisë Krujë. Sipas autoriteteve, Zalla i shmangej prej kohësh drejtësisë dhe konsiderohej person me rrezikshmëri të lartë shoqërore.
Ministri për Punët e Brendshme, Besfort Lamallari, përgëzoi strukturat e Policisë për kapjen e të shumëkërkuarit.
“Përgëzime Policisë së Shtetit për finalizimin me sukses të operacionit policor ‘Fundi i Arratisë’, për kapjen e një personi shumë të kërkuar dhe me rrezikshmëri të lartë shoqërore”, deklaroi Lamallari.
Ndërkohë, shpërthimi në banesën e Zallës ndodhi një natë më parë në fshatin Zallë të Fushë-Krujës. Sipas të dhënave paraprake të Policisë, në derën e banesës dyshohet se ishte vendosur një sasi lënde plasëse, e cila më pas shpërtheu. Nga shpërthimi pati dëme materiale në banesë, ndërsa flakët përfshinë edhe automjetin e Zallës, i cili ishte parkuar pranë banesës. Automjeti u dogj, ndërsa nuk pati persona të lënduar.
Ylli Zalla nuk është një emër i panjohur për autoritetet. Në të kaluarën, ai është arrestuar dhe hetuar për çështje të lidhura me armët dhe prodhimin e “bombave artizanale”.
Më herët, autoritetet kanë sekuestruar një arsenal armësh në banesën e tij në Fushë-Krujë. Po në kuadër të hetimeve për një atentat mafioz në Rinas, Zalla është përmendur nga autoritetet për lidhje me personat e dyshuar për ngjarjen. Sipas hetimeve të asaj kohe, nga banesa e tij dyshohej se kishte dalë edhe automjeti i përdorur nga autorët e atentatit, ndërsa Zalla dyshohej se i kishte ndihmuar për sigurimin e armëve.
Zalla ka rënë në pranga edhe në vitin 2014, në një operacion ku u raportua për prodhim të bombave artizanale. Në atë kohë, autoritetet e dyshonin gjithashtu për lidhje me persona të përfshirë në rrjete që rekrutonin shqiptarë për të luftuar në Siri dhe për lidhje të dyshuara me ISIS.
/rtsh.al/