Pa patentë apo të dehur në timon, arrestohen 39 shoferë në një javë
TIRANË, 20 tetor /ATSH/ Policia Rrugore ka bërë bilancin javor, duke theksuar idenë se prania e mjeteve inteligjente dhe baza logjistike që ka në dispozicion është në funksion të rritjes së parametrave të sigurisë rrugore pranë shkollave, në akset rrugore, si edhe qendrat urbane dhe rurale.
Sipas Policisë Rrugore, si rezultat i monitorimeve në të gjitha akset rrugore, 24/7, duke përdorur mjete inteligjente poliskanë, radarë automatikë, dronë të cilësisë së lartë dhe dragera, gjatë kësaj jave janë arrestuar 39 drejtues mjetesh, për drejtim të mjetit në gjendje të dehur dhe për drejtim të mjetit pa leje drejtimi
Janë evidentuar nëpërmjet radarëve dhe poliskanëve, 1456 drejtues automjetesh të cilët qarkullonin me shpejtësi 40 deri në 100 km në orë mbi normën e lejuar.
Drejtuesit e automjeteve janë ndëshkuar me dyfishin e masës administrative maksimale dhe zbritje 3 deri në 8 pikë nga Leja e Drejtimit.
Gjithashtu, në të gjithë vendin janë vendosur 23414 masa administrative, nga këto: 5678 për shpejtësi tej normave të lejuara, me sanksione plotësuese; 1123 për përdorim të celularit gjatë drejtimit të mjetit; 1235 për mospërdorim të rripit të sigurimit; 2134 për parakalime të gabuara; 215 për mosvendosje të kaskës mbrojtëse; 98 për manovra të rrezikshme në rrugë; 267 për drejtim të mjetit nën efektin e alkoolit; 9875 për parkim të gabuar; 2789 për shkelje të tjera të Kodit Rrugor.
Policia Rrugore thekson se ka marrë një sërë masash shtesë në kuadër të fillimit të vitit të ri shkollor.
Policia Rrugore apelon për të gjithë drejtuesit e automjeteve dhe motomjeteve për zbatim me rigorozitet të rregullave të qarkullimit rrugor, që t’ju japin përparësi këmbësorëve dhe të mos kryejnë parakalime të gabuara apo manovra të rrezikshme, të mos përdorin celularin gjatë drejtimit të automjetit dhe të vendosin rripin e sigurimit.
Me qëllim rritjen e parametrave të sigurisë rrugore, Policia e Shtetit fton qytetarët që të denoncojnë në numrin pa pagesë 112 çdo rast të shkeljes së rregullave të qarkullimit rrugor.
/e.i/r.e/