Pas kërkesës për siguri, Durim Bami dërgohet në burgun e Peqinit

Durim Bami është transferuar sërish nga autoritetet penitenciare, këtë herë nga burgu i Fushë-Krujës drejt burgut të sigurisë së lartë në Peqin.

Lëvizja është kryer gjatë ditës së sotme, vetëm pak kohë pasi vetë Bami kishte kërkuar transferimin nga paraburgimi “313” drejt Fushë-Krujës, me pretendimin se jeta e tij ishte në rrezik.

Ende nuk janë bërë publike arsyet zyrtare të transferimit të fundit, por sipas burimeve pranë sistemit penitenciar, një nga faktorët kryesorë lidhet me çështjet e sigurisë.

Prej ditësh, në institucionet e vuajtjes së dënimit në vend po zhvillohen kontrolle të shumta në qeli, si në burgjet e sigurisë së lartë ashtu edhe në ato të sigurisë së zakonshme.

Burime pranë Drejtorisë së Përgjithshme të Burgjeve bëjnë me dije se kontrollet janë pjesë e një plani masash që synon sekuestrimin e telefonave celularë dhe sendeve të ndaluara brenda qelive.

Po ashtu, sipas të njëjtave burime, synohet edhe kufizimi i takimeve speciale të disa të burgosurve VIP, për të cilët dyshohet se kanë zhvilluar takime me persona që nuk janë familjarë apo bashkëshorte të tyre.