“Për ju është rutinë, për mua është jetë” - publikohet letra e Arlinda Zekajt drejtuar gjyqtarit Migjen Kastrati

Një tjetër dokument që lidhet me rastin e Arlinda Zekajt është bërë publik në rrjetet sociale. Kësaj radhe bëhet fjalë për një letër të shkruar me dorë, e cila i drejtohet gjyqtarit të Gjykatës Themelore në Pejë, Migjen Kastrati.

Në letrën e publikuar nga Natyra Kuçi asamblesite në Deçan nga Partia Socialdemokrate , e cila mban datën 7 shtator 2026, Arlinda Zekaj shpreh shqetësimet e saj lidhur me sigurinë personale dhe të fëmijëve, duke kërkuar trajtim të çështjeve që lidhen me mbrojtjen dhe kujdestarinë e fëmijës.

Ajo i drejtohet gjyqtarit me një mesazh të drejtpërdrejtë, ku thekson rëndësinë që kanë për të vendimet që merren nga institucionet e drejtësisë.

“Për ju është rutinë, për mua është jetë dhe veç Zoti e di pse ty të ka zgjedhë të shpëtosh jetë", kishte shkruar e ndjera.

Kjo fjali merr një domethënie të veçantë në dritën e tragjedisë që pasoi, pasi në të Arlinda shpreh se për të çështja nuk ishte thjesht një procedurë gjyqësore, por diçka që lidhej drejtpërdrejt me jetën dhe sigurinë e saj.

Migjen Kastrati është gjyqtar në Gjykatën Themelore në Pejë dhe emri i tij është përmendur edhe në raportimet për masën mbrojtëse të caktuar ndaj Arlindës.

Publikimi i kësaj letre rikthen vëmendjen te kërkesat që ajo kishte paraqitur dhe te mënyra se si institucionet e drejtësisë i kishin trajtuar shqetësimet e saj.

E Kuçi ka shkruar se kjo ishte vetëm njëra prej lutjeve të Arlindës për gjyqtarin Kastrati, duke kërkuar dorëheqjen e tij. /Telegrafi/