Përndoqi për një vit e gjysmë 39-vjeçaren, tentoi ta rrëmbente dhe dhunoi shoqëruesin e saj, arrestohet i riu nga Kuçova

Shërbimet e Drejtorisë Vendore të Policisë Elbasan, në bashkëpunim me Komisariatin e Policisë Librazhd, kanë finalizuar operacionin e koduar “Insistimi”.

Si rezultat i këtij operacioni, u arrestua në flagrancë një shtetas 32 vjeç, banues në fshatin Perondi, Kuçovë, i cili dyshohet se kishte përndjekur për rreth një vit e gjysmë një shtetase 39 vjeçe.

Sipas hetimeve, 32-vjeçari ka tentuar ta marrë me forcë 39-vjeçaren në automjetin e tij. Gjatë incidentit, ai ka ushtruar dhunë fizike ndaj shtetasit që shoqëronte 39-vjeçaren, duke e goditur me grushte, dhe më pas është larguar nga vendngjarja.

Pas njoftimit për konfliktin e ndodhur në ambientet e jashtme të një karburanti në Librazhd, shërbimet e Policisë ndërhynë menjëherë për zbardhjen e rrethanave dhe identifikimin e personave të përfshirë.

Autori u kap në hyrje të qytetit të Elbasanit, ndërsa drejtonte automjetin në gjendje të dehur.

Policia sekuestroi automjetin dhe telefonin celular të të arrestuarit, si prova materiale.