Përvjetori i ushtrisë dhe ditëlindja e Trumpit, Amerika përgatitet për një paradë gjigante ushtarake

Ushtria e Shteteve të Bashkuara do të organizojë më 14 qershor një paradë të madhe ushtarake për të shënuar 250-vjetorin e themelimit të saj, një ngjarje historike që ka ngjallur debate për shkak të përkimit me ditëlindjen e ish-presidentit Donald Trump.

Sipas zyrtarëve të ushtrisë, në paradë do të marrin pjesë mbi 6,600 ushtarë, 150 automjete ushtarake, 50 helikopterë si dhe shtatë banda muzikore ushtarake. Ngjarja do të zhvillohet në kryeqytetin amerikan dhe do të pasohet me një spektakël fishekzjarresh në National Mall.

Ndërsa ushtria thekson se qëllimi i paradës është të nderojë themelimin e saj në vitin 1775, kritikët në Kongres e kanë quajtur atë një “paradë ditëlindjeje presidenciale”, duke ngritur shqetësime për shpenzimin e fondeve publike për një aktivitet që mund të ketë tone politike.

Nuk është ende e qartë nëse Trump do të marrë pjesë drejtpërdrejt në paradë, por pritet që ai të jetë i pranishëm në disa ceremoni zyrtare, përfshirë betimin e rekrutëve të rinj të ushtrisë.

Në kuadër të festimeve, do të zhvillohet edhe një ceremoni për vendosjen e një kurore në Varrezat Kombëtare të Arlingtonit, si dhe një festë në Qendrën Kombëtare.

Kostoja e përgjithshme e paradës ende nuk është publikuar zyrtarisht, por vlerësimet flasin për një shifër që varion nga 25 deri në 45 milionë dollarë. Këto nuk përfshijnë kostot shtesë për sigurinë, pastrimin dhe riparimet e mundshme të infrastrukturës në Uashington. Për të shmangur dëmtimet nga makineritë e rënda ushtarake, autoritetet kanë planifikuar vendosjen e pllakave metalike mbrojtëse në kryqëzimet rrugore.