Plani i Rritjes së BE, Shqipëria kryeson në rajon me 212,8 milionë euro të disbursuara
TIRANË, 20 maj /ATSH/ Komisioni Europian njoftoi sot se Shqipëria ka përfituar disbursimin e 49 milionë eurove nga Instrumenti Evropian për Reforma dhe Rritje (RGF), si rezultat i zbatimit me sukses të masave të Agjendës Kombëtare të Reformave.
Agjencia Shtetërore e Programimit Strategjik dhe Koordinimit të Ndihmës (SASPAC), në një njoftim për media ka reaguar për vendimin e marrë nga Komisioni Europian.
“Raporti i dytë i publikuar ditën e sotme nga Komisionin Europian dëshmon progres të qëndrueshëm dhe kontribuon drejtpërdrejt në përshpejtimin e rrugës europiane të Shqipërisë. Në rajon Shqipëria kryeson me 212,8 milionë euro të disbursuara, e ndjekur nga Maqedonia e Veriut me 142,1 milionë euro dhe në vendin e tretë renditet Mali i Zi me 89,3 milionë euro”, thuhet në njoftim.
Eridana Çano, drejtoreshë e përgjithshme e SASPAC, shprehet se, “progresi i arritur në këtë raportim është dëshmi konkrete se Shqipëria zbaton reformat me seriozitet dhe vendosmëri. Çdo euro e disbursuar nga BE-ja është rezultat i punës reale dhe ndryshimeve të prekshme për qytetarët dhe bizneset shqiptare”.
49 milionë euro disbursim i konfirmuar nga BE-ja në kuadër të Planit të Rritjes Ekonomike, 22,8 milionë euro shkojnë drejtpërdrejtë në buxhetin e shtetit; 26,2 milionë euro për fondin e investimeve në WBIF. Ndërkohë që 12 prej 21 masave të Agjendës së Reformave të përmbushura në këtë raund (57%)”.
SASPAC bën të ditur se, progresi sipas fushave të reformës rezulton në:
1-Zhvillimin e Sektorit Privat dhe Mjedisi i Biznesit
Miratimi i ligjit për partneritetet publike-private dhe koncesionet, në përputhje me standardet e BE-së.
Ratifikimi i protokollit për dokumentin elektronik të transportit rrugor (eCMR) digjitalizim i proceseve logjistike.
Miratimi i planit të integritetit për shërbimet e Kadastrës dhe programit për promovimin e eksporteve.
- Kapitali Njerëzor
Zhvillim profesional për 50% të stafit mësimor parauniversitar.
Përditësimi i Kuadrit Kombëtar të Kualifikimeve me standarde europiane (ESG 3.3 dhe ESG 2.7).
- Digjitalizimi
Miratimi i akteve ligjore për instrumentet e mbështetjes së inovacionit, në përputhje me standardet e BE-së.
Zbatimi i skemave të granteve për inkubatorë dhe akseleratorë — forcim i ekosistemit inovativ.
- Tranzicioni i Gjelbër dhe Energjia
Heqja graduale e ndërhyrjes publike në çmimet e energjisë elektrike për konsumatorët në tension të mesëm dhe të lartë.
- Të Drejtat Themelore dhe Shteti i së Drejtës
Aplikimi për anëtarësim në rrjetet europiane të rikuperimit të pasurive me origjinë kriminale.
Masat për përafrimin e politikës së vizave me standardet e BE-së.
Instrumenti për Reforma dhe Rritje (RGF) është boshti financiar i Planit të Rritjes të BE-së për Ballkanin Perëndimor, paketa më ambicioze e mbështetjes europiane e ofruar ndonjëherë para anëtarësimit. Disbursimi i fondeve është i lidhur drejtpërdrejt me zbatimin e reformave. Plani i Rritjes parashikon 6 miliardë euro për të gjashta vendet e Ballkanit Perëndimor (2 miliardë grante dhe 4 miliardë hua), me Shqipërinë si përfituese deri në 922 milionë euro.
/e.xh/a.f/r.e/