Policia e Shtetit angazhoi mbi 900 punonjës për mbarëvajtjen e provimit të tretë të Maturës Shtetërore

Provimi i tretë i Maturës Shtetërore është përmbyllur pa probleme sa i përket rendit dhe sigurisë publike. Për garantimin e mbarëvajtjes së këtij procesi, Policia e Shtetit ka angazhuar një strukturë prej më shumë se 900 punonjësish policie në të gjithë vendin.

Sipas njoftimit zyrtar të shpërndarë nga autoritetet e policisë, efektivët kanë ndjekur të gjitha fazat e procesit të administrimit të materialeve dhe ruajtjes së perimetrave të sigurisë në ambientet e përcaktuara për testimin.

Angazhimi i strukturave policore është shtrirë si përpara nisjes, ashtu edhe pas përfundimit të provimit. Në deklaratën e saj zyrtare, Policia e Shtetit specifikoi detyrat e kryera nga punonjësit e angazhuar:

“Punonjësit e Policisë u angazhuan për shoqërimin dhe ruajtjen e materialeve të provimit, garantimin e rendit dhe sigurisë në qendrat ku u zhvillua provimi, si dhe për shoqërimin e materialeve në destinacionin përkatës, pas përfundimit të provimit.”

Në mbyllje të komunikates, institucioni ka përcjellë edhe një mesazh institucional drejtuar nxënësve, ku shkruhet:

“Policia e Shtetit uron maturantët, suksese në provimin e radhës!”

/rtsh.al/