Rama denoncon manipulimin/ Kryeministri: Protestë me ndërtues pa leje, që kamuflohen si mbrojtës mjedisi

Një protestë me ndërtues pa leje, të kamufluar si mbrojtës mjedisi dhe të fshehur pas flamurit të PD.

Kryeministri Edi Rama ka denoncuar manipulimin e protestës në bulevard, me një grua e cila proteston për Zvërnecin, por nga ana tjetër ka ndërtuar në Kalanë e Durrësit pa leje dhe kundërshton shembjen në kuadër të pastrimit të trashëgimisë kulturore.

“Majtas: Një shtesë skandaloze pa leje brenda mureve të Kalasë së Durrësit. Shteti do ta shpronësojë në kuadrin e pastrimeve për Rilindjen e Zonës Historike, sipas projektit të miratuar”, ka shkruar Rama.

Rama shkruan se kjo zonjë, është e njëjta e cila me mikrofon në foltoren e protestës në bulevard, bën thirrje që diaspora të protestojë, ndërkohë që nuk pranon as të dëmshpërblehet, por paralajmëron vetëvrasje nëse i prishet ndërtimi pa leje.

“Djathtas: Një protestuese e përbetuar për mbrojtjen e mjedisit që bërtet, “Diaspora këtë vit nuk do të vijë për pushime, por për protestë”. Ajo është vetë ndërtuesja e shtesës pa leje, e cila ka deklaruar përpara meje se do hidhet me kokë nga tarraca, po nuk e pranon fondin e shpronësimit të atij çibani ngaqë i duket pak”, shtoi ai.

Madje Rama denoncon se gruaja është militante e PD, dhe ka marrë hipotekë për pronë në zonë të trashëgimisë kulturore, pikërisht në kohën e qeverisjes së Sali Berishës.

“Fakti pastaj që ky personazh grotesk është edhe militante e vajmedet Partisë Demokratike, e fut rastin në një kornizë shembullore të dashurisë për natyrën. Çibani ka një hipotekë nga koha e dy gishtave”, përfundoi Rama./abcnews.al