Reforma gjyqësore në Bosnje-Hercegovinë, miratimi i dy ligjeve kryesore, kyçe për të nisur negociatat me BE-në
Reforma gjyqësore është çelësi për rrugën europiane të Bosnjës dhe Hercegovinës, raporton RTBH. Dy ligjet më të rëndësishme që duhet të miratohen janë ligji për gjykatat dhe ligji për Këshillin e Lartë Gjyqësor dhe Prokurorial, që garanton pavarësinë e gjyqtarëve dhe prokurorëve.
Deri tani, asnjë nga këto ligje nuk ka marrë mbështetjen e nevojshme për miratim. Pa to, Bosnja nuk mund të hapë negociatat e pranimit me Bashkimin Europian.
RTBH tregon se problemi kryesor është mungesa e konsensusit mbi përbërjen e KLGJP-së. Ekspertët thonë se fokus duhet të jetë te pavarësia, profesionalizmi dhe integriteti i gjyqtarëve.
Ish-gjyqtari Branko Perić shpjegon se sistemi gjyqësor ngadalëson shumë çështje, nuk lufton mjaftueshëm korrupsionin dhe krimin e organizuar dhe ka ligje të dobëta.
Transparency International BiH thotë se dy ligjet e propozuara mund të përmirësojnë gjyqësorin, por nuk dihet nëse plotësojnë standardet europiane. Lufta kundër korrupsionit, gjyqësori i pavarur dhe praktikat e njëjta në të gjithë vendin janë shtyllat e sundimit të ligjit që kërkon BE-ja.
Eksperti Almin Dautbegović thekson se gjithçka varet nga situata politike dhe konsensusi i pushtetarëve lokalë.
Sondazhet tregojnë se besimi i qytetarëve te gjyqësori është i ulët.
RTBH raporton se, për gati dy dekada, shumica e reformave kanë ardhur nga jashtë dhe autoritetet vendase nuk kanë bërë mjaftueshëm për të forcuar pavarësinë e gjyqtarëve.
Gazetar: Artur Mata
/rtsh.al/