Rivali i parë i Infantino/ Ramon Vega zyrtarizon kandidaturën e tij për president të FIFA

Gianni Infantino, tani ka një rival zyrtar në misionin e tij për të marrë një tjetër mandat si president i FIFA. Ai është Ramon Vega. Edhe ky zvicerian, ish futbollist i kombëtares helvete dhe i skuadrave si Tottenham, Celic dhe Cagliari ka konfirmuar kandidaturën e tij për të marrë drejtimin e qeverisë botërore të futbollit.

Ramon Vega është 55 vjeç, ndërsa që kur u largua nga futbolli ka punuar në sektorin financiar.

“Po kandidoj për të bashkuar familjen e futbollit dhe për të realizuar një reformë e modernizim të FIFA-s, për të rikthyer stabilitetin dhe kredibilitetin e saj, si dhe për të rindërtuar besimin për të cilin sporti ynë ka nevojë urgjente”, është shprehur ai në një deklaratë të publikuar nga BBC.

Kjo nuk është hera e parë, që Ramon Vega shfaq në ambicje të tillë. Në kulmin e skandalit që tronditi FIFA në vitin 2015, zviceriani provoi të merrte vendin e Sep Blater të shkarkuar, por edhe atëherë u mund nga Infantino.

Por këtë herë, ai beson se ka më shumë shanse, pasi presidenti aktual I FIFA është në një pozicion të vështirë për shkak të planit të tij për të shitur aksione të Kupën e Botës te investitorë privatë. Pavarësisht përplasjeve të forta me UEFA dhe disa konfederata të tjera të futbollit në botë, Infantino ka deklaruar se do të kërkojë rizgjedhjen e tij.

Ramon Vega është rivali I tij i parë zyrtar, ndërsa kandidaturat për zgjedhjet për presidentin e FIFA duhet të dorëzohen deri më 18 nëntor. Votimi do të zhvillohet më 18 maj në Kongresin, që do të mbahet në Rabat të Marokut.