Rusia godet me raketa qytetin ukrainas, 31 të vrarë, mes tyre fëmijë
UKRAINË – Të paktën 31 persona, përfshirë dy fëmijë, janë vrarë pas një “sulmi raketor ndaj civilëve” sipas kryebashkiakut në detyrë të qytetit Sumy, Artem Kobzar.
Presidenti ukrainas Volodymyr Zelensky thotë se “raketat ruse goditën një rrugë të zakonshme të qytetit, shtëpi, institucione arsimore, makina në rrugë” dhe se një operacion shpëtimi tani është duke u zhvilluar.
Presidenti bën thirrje për “një reagim të ashpër nga bota”.
Zelensky tha se Rusia goditi qendrën e Sumy-t “në ditën kur njerëzit shkojnë në kishë – të Dielën e Palmave, festën e hyrjes së Jezusit në Jerusalem”.
“Shtetet e Bashkuara, Evropa, të gjithë në botë që duan t’i jepet fund kësaj lufte dhe vrasjesh të reagojnë. Rusia dëshiron pikërisht këtë lloj terrori dhe po e zvarrit këtë luftë. Pa presion mbi agresorin, paqja është e pamundur”, thotë Zelensky.
Ai shton se “bisedimet nuk i kanë ndalur kurrë raketat balistike dhe bombat ajrore”.
Sipas ministrit të Brendshëm të Ukrainës Ihor Klymenko, nga sulmi janë plagosur 83 persona, përfshirë fëmijë.
Ministri i Jashtëm i Ukrainës, Andrii Sybiha, ka dënuar sulmin: “Nisja e një sulmi të tillë në një festë të madhe të krishterë është e keqe absolute”.
Ai gjithashtu kritikon Rusinë për refuzimin e një propozimi të SHBA-së për armëpushim dhe u kërkon partnerëve të Ukrainës të rrisin presionin ndaj Moskës.
“Forca është gjuha e vetme që ata mund të kuptojnë dhe mënyra e vetme për t’i dhënë fund terrorit të tmerrshëm.”
Sulmi raketor në Sumy vjen pasi i dërguari i SHBA Steve Witkoff u takua me Presidentin rus Vladimir Putin në Shën Petersburg të premten.
Kremlini tha se takimi zgjati më shumë se katër orë dhe u fokusua në “aspekte të një zgjidhjeje të luftës në Ukrainë”.
Takimi, i treti i Witkoff me Putinin këtë vit, u përshkrua nga i dërguari i posaçëm Kirill Dmitriev si “produktiv”.
Trump, presidenti amerikan, ka shprehur zhgënjimin për ecurinë e bisedimeve. Të premten, ai shkroi: “Rusia duhet të lëvizë. Shumë njerëz po vdesin, mijëra në javë, në një luftë të tmerrshme dhe të pakuptimtë.”/vizionplus.tv