Shehaj për zgjedhjet në Tiranë: Opozita fiton vetëm me kandidat jashtë partive

Kryetari i Partisë “Mundësia”, Agron Shehaj, ka bërë një thirrje për partinë më të madhe të opozitës (PD), duke deklaruar se fitorja e Bashkisë së Tiranës mund të arrihet vetëm nëse opozita bashkohet pas një kandidati që është jashtë radhëve të politikës.

Në një konferencë për shtyp të mbajtur sot, Shehaj e kushtëzoi bashkëpunimin me Partinë Demokratike (PD) me këtë vendim parimor.

Kushti i përbashkimit, Shehaj: Jo emra partiakë

Shehaj theksoi se partia e tij nuk ka zhvilluar ende negociata zyrtare me PD-në. Ai bëri të qartë se nuk do të ulet në asnjë tryezë negociatash nëse nuk merret paraprakisht vendimi që kandidati opozitar:

Të jetë jashtë politikës;

Të jetë i pakorruptuar;

Të jetë përbashkues për të gjitha partitë opozitare.

Sipas tij, PD duhet të kuptojë se rezultatet negative të 12 viteve të fundit janë pasojë e dështimit për të gjetur një kandidat jashtë radhëve të politikës.

“PD duhet të kuptojë që opozita ka 12 vite që korr të njëjtin rezultat me humbje për shkak se nuk ka gjetur një kandidat jashtë radhëve të politikës,” deklaroi Shehaj.

Alternativa kundër Manastirliut

Kreu i Partisë Mundësia njoftoi se forca e tij politike ka identifikuar disa emra alternativë që mund ta përfaqësojnë me sukses opozitën e bashkuar në garën kundër kandidates së Partisë Socialiste, Ogerta Manastirliu.

Zgjedhjet e parakohshme për Tiranën priten pas përfundimit të ankimimit në Gjykatën Kushtetuese për vendimin e shkarkimit të ish-Kryetarit, Erion Veliaj. Ndërkohë, Partia Demokratike ka ngritur një grup pune dhe ka shprehur gatishmërinë për të negociuar me aleatët për një kandidat të përbashkët.

/rtsh.al/