Shoqërimi i fëmijës nga të afërmit për udhëtim, tani me deklaratë noteriale në e-Albania
Ambasadat dhe konsullatat e Shqipërisë do t’u mundësojnë prindërve që të lejojnë shoqërimin e fëmijëve jashtë vendit nga një person i afërt i familjes, përmes një deklarate noteriale.
Lajmin e dha të premten ministri për Evropën dhe Punët e Jashtme, Igli Hasani.
Aplikimi për deklaratën njëvjeçare noteriale do të kryhet përmes platformës qeveritare e-Albania dhe njoftimi për pranimin ose refuzimin e mundshëm do të bëhet nëpërmjet postës elektronike brenda 10 ditëve.
Aplikantët duhet të paraqitin pasaportën ose një kartë biometrike identiteti të vlefshme, dokumentet që konfirmojnë rregullshmërinë e deklaratës së kërkuar, si edhe mandatpagesën prej 20 euro për shërbimin.
Me pranimin e tyre, nis faza e marrjes së shërbimit në formën fizike në Ambasadë/Konsullatë, ku bëhet paraqitja e dokumentacionit origjinal brenda 20 ditëve.
Deklaratat noteriale mund të lëshohen për disa nevoja:
- Për njohje fëmije;
- Për udhëtimin e fëmijëve me njërin nga prindërit, me të afërt të familjes;
- Për të ardhurat (p.sh. studentët);
- Deklaratë gjallese;
- Për pajisjen e fëmijëve me Leje Qëndrimi (kur njëri prind autorizon prindin tjetër) – vetëm për Greqinë;
- Për lënien e shtetësisë shqiptare për fëmijën minoren.
/rtsh.al/