Shqipëria rikonfirmon angazhimin për sigurinë ujore në nismën globale “Water Forward”

TIRANË, 17 prill /ATSH/ Shqipëria rikonfirmoi angazhimin e saj për garantimin e sigurisë afatgjatë të burimeve ujore gjatë lançimit të nismës globale “Water Forward”, të organizuar nga Grupi i Bankës Botërore në kuadër të Takimeve të Pranverës. BB bën të ditur se, në këtë aktivitet të nivelit të lartë, që synon forcimin e sigurisë ujore dhe zgjerimin e partneriteteve në sektorin e ujit përmes mobilizimit të investimeve, ministri i Financave, Petrit Malaj, theksoi angazhimin e Shqipërisë për zhvillimin e qëndrueshëm të sektorit të ujit.

“Me objektiva të qarta deri në vitin 2030 dhe në partneritet të ngushtë me institucionet ndërkombëtare, Shqipëria do të vijojë të punojë për ndërtimin e një sektori modern, të qëndrueshëm dhe në përputhje me standardet europiane”, u shpreh Malaj.

Nisma “Water Forward”, e lançuar nga Grupi i Bankës Botërore në bashkëpunim me banka multilaterale zhvillimi dhe partnerë ndërkombëtarë, synon përmirësimin e sigurisë ujore për mbi 1 miliard njerëz deri në vitin 2030, përmes reformave, financimit dhe partneriteteve që rrisin qëndrueshmërinë e sistemeve të ujit ndaj thatësirave dhe përmbytjeve.

Presidenti i Grupit të Bankës Botërore, Ajay Banga, theksoi rëndësinë e ujit për funksionimin e ekonomive, duke nënvizuar nevojën për harmonizimin e reformave dhe financimeve për zgjerimin e shërbimeve të sigurta ujore.

Sipas Bankës Botërore, mungesa e ujit mbetet një sfidë serioze për zhvillimin ekonomik dhe punësimin global, ndërsa kërkesa për ujë pritet të tejkalojë ofertën në vitet e ardhshme. Nisma synon gjithashtu të mbështesë përmirësimin e aksesit në ujë për 400 milionë njerëz deri në vitin 2030.

e.xh/j.p/