Starmer udhëton drejt Gjirit Persik: Mbretëria e Bashkuar do të bëjë gjithçka për të mbështetur armëpushimin

Kryeministri i Mbretërisë së Bashkuar, Keir Starmer, do të udhëtojë sot në Gjirin Persik për t’u takuar me udhëheqësit në rajon, pas arritjes së armëpushimit mes SHBA-së dhe Iranit.

Starmer e ka përshëndetur armëpushimin, duke e cilësuar atë si një lehtësim për rajonin dhe gjithë botën.

Ai theksoi se Mbretëria e Bashkuar, në bashkëpunim me partnerët ndërkombëtarë, do të bëjë “gjithçka që është e mundur” për të mbështetur qëndrueshmërinë e kësaj marrëveshjeje.

“Duhet të punojmë për ta kthyer këtë armëpushim në një marrëveshje të përhershme dhe për të siguruar rihapjen e Ngushticës së Hormuzit”, deklaroi ai.

Gjatë takimeve me liderët rajonalë, Starmer pritet të ritheksojë mbështetjen e palëkundur të Britanisë dhe nevojën për një zgjidhje diplomatike afatgjatë.

Një nga temat kryesore do të jetë garantimi që rihapja e Ngushticës së Hormuzit të jetë e përhershme, ndërsa Londra synon të vijojë rolin udhëheqës në përpjekjet ndërkombëtare.