Taylor Swift dhe Travis Kelce dyshohet se dogjën dekorimet e dasmës 30 milionë dollarëshe, zbulohet arsyeja e pazakontë!

Ekipi i Taylor Swift dhe Travis Kelce dyshohet se mori një vendim të pazakontë pas dasmës së tyre luksoze: dekorimet dhe strukturat e ndërtuara posaçërisht për ceremoninë u transportuan për t’u shkatërruar, me qëllim që të mos përfundonin në duart e koleksionistëve apo në ankande.

Sipas një burimi të cituar nga Daily Mail, çifti dëshironte të shmangte mundësinë që elementet dekorative të vidhnin vëmendjen edhe pas ceremonisë dhe të shiteshin më vonë si suvenire. Për këtë arsye, thuhet se u vendos që ato të digjeshin.

“Ata nuk donin që dikush t’i vidhte dhe më pas t’i nxirrte në ankand ose t’i shiste, ndaj i dogjën të gjitha”, pretendoi burimi.

Dekorimet ishin projektuar dhe ndërtuar posaçërisht për dasmën. Mes tyre kishte elemente me inicialet e ndërthurura “T”, si dhe struktura të frymëzuara nga një kopsht, të cilat ishin pjesë e konceptit vizual të ceremonisë.

Sipas të njëjtit raport, strukturat u transportuan nga Nju Jorku drejt Pensilvanisë, ku ishin ndërtuar fillimisht, përpara se të shkatërroheshin.

“Na kishin thënë se do t’i digjnin, por nuk e di saktësisht se ku u krye procesi”, shtoi burimi.

Për transportin e dekorimeve, thuhet se u përdorën 11 kamionë të mëdhenj, të mbushur me strukturat dhe materialet e përdorura gjatë përgatitjeve.

“Fakti që nuk u la asnjë suvenir dhe se gjithçka duhej të digjej e të shkatërrohej në këtë mënyrë është disi i çmendur”, u shpreh burimi, duke e cilësuar të pazakontë transportimin e materialeve në një distancë kaq të gjatë vetëm për t’i shkatërruar më pas.

Dasma luksoze që thuhet se kushtoi 30 milionë dollarë

Sipas raportimeve të cituara në artikull, ceremonia e dasmës u zhvillua më 3 korrik në Madison Square Garden, në prani të më shumë se 1.000 të ftuarve. Mes emrave të njohur që pretendohet se morën pjesë përmenden Selena Gomez, Brad Pitt, Dakota Johnson dhe Ed Sheeran.

Kostoja e përgjithshme e eventit është vlerësuar nga një ekspert në rreth 30 milionë dollarë, duke e vendosur atë mes ceremonive më të kushtueshme të përfolura në botën e showbiz-it.

Megjithatë, sipas një raporti të mëparshëm të Daily Mail, çifti thuhet se hoqi dorë nga disa prej ideve më ambicioze për dekorimin dhe argëtimin e të ftuarve.

Një prej tyre ishte një karusel dykatësh, i cili pretendohet se do të kushtonte rreth 7 milionë dollarë, por që përfundimisht u zëvendësua me një hapësirë të projektuar posaçërisht për lojëra.

Në planet fillestare përmendej edhe krijimi i një liqeni artificial, por ideja thuhet se u braktis për shkak të shqetësimeve për sigurinë dhe kompleksitetit teknik që do të kërkonte realizimi i tij.