Tërmeti godet Japoninë, të paktën 37 persona të plagosur

Një tërmet me magnitudë 5.9 goditi Japoninë mëngjesin e kësaj të diele, duke shkaktuar lëkundje të forta dhe duke plagosur të paktën 37 persona. Tërmeti u regjistrua në pjesën jugore të prefekturës Ibaraki, pranë Tokios, në një thellësi prej rreth 68 kilometrash.

Agjencia Meteorologjike e Japonisë tha se nuk kishte rrezik për cunam. Agjencia japoneze për Menaxhimin e Zjarreve dhe Fatkeqësive njoftoi se 37 persona mbetën të plagosur, ndërsa një prej tyre është në gjendje të rëndë. Një ndërtesë u dëmtua në prefekturën Saitama.

Lëkundjet u ndjenë edhe në Tokio dhe në prefekturat Ibaraki, Saitama dhe Chiba. Për shkak të tërmetit, disa shërbime hekurudhore në zonat përreth Tokios u ndërprenë ose patën vonesa. Kryeministrja japoneze, Sanae Takaichi, tha se autoritetet po vlerësojnë dëmet dhe po marrin masat e nevojshme për të garantuar sigurinë e qytetarëve.

Ajo u bëri thirrje banorëve në zonat ku lëkundjet ishin më të forta që të qëndrojnë vigjilentë, pasi ekziston mundësia e një tjetër tërmeti me magnitudë të ngjashme. Takaichi tha gjithashtu se autoritetet do të vijojnë të informojnë publikun në kohë dhe me të dhëna të sakta.