Transporti publik me flotë të vjetëruar dhe mungesë financimi

Qendra Mjedisore për Edukim, Zhvillim dhe Rrjetëzim (EDEN) zhvilloi të premten paradite një tryezë të përbashkët mbi sistemin e transportit publik në Tiranë, duke prezantuar gjetjet kryesore të një sondazhi publik, si edhe duke identifikuar sfidat që qytetarët hasin në përdorimin e transportit.

Ersa Prifti, menaxhere projekti pranë qendrës EDEN, theksoi se, sipas gjetjeve të sondazhit të tyre, pothuajse 50% e të anketuarve janë shprehur se mjeti kryesor i lëvizshmërisë për ta është transporti publik, por shumica prej tyre e kanë vlerësuar atë negativisht.

“69% e të anketuarve u shprehën se nuk kanë akses të barabartë në transportin publik,” tha ajo duke iu referuar gjetjet e sondazhit.

“Koha e gjatë e pritjes, oraret e parespektuara, kushtet e dobëta dhe mungesa e infrastrukturës, si edhe mungesa e aksesit për personat me aftësi të kufizuara, mbeten disa nga sfidat e raportuara nga pjesa më e madhe e të anketuarve,” shtoi Prifti.

Lidhur me sigurinë e sistemit të transportit, qytetarët e anketuar janë të ndarë në mënyrë të barabartë: gjysma shprehen se ndihen të sigurt, ndërsa gjysma tjetër e shohin si shqetësues faktin e ekzistencës së ngacmimeve seksuale apo episodeve të vjedhjeve në mjetet e transportit publik.

Nevoja për rinovimin e flotës së autobusëve ishte një tjetër problematikë që përfaqësuesit e shoqatave të transportit sollën në tryezë.

Kujtim Mema, nga Shoqata Kombëtare e Transportit Ndërqytetas, u shpreh se ka dukshëm nevojë për përmirësimin e flotës së autobusëve në vend, por kjo pamundësohet për shkak të mungesës së investimeve.

“Operatorët e transportit çalojnë në investime sepse tarifat janë shumë të ulëta, dhe barra u bie qytetarëve,” tha Kujtim Mema, duke theksuar se shteti duhet të funksionojë si rregullator i këtyre çështjeve.

“Nuk duhet të hezitojmë të kërkojmë llogari, sepse nuk e kemi pasur ndihmën e tyre,” shtoi ai, duke iu referuar mungesës së mbështetjes nga institucionet shtetërore.

Ngjashëm, edhe Dashnor Mema, kryetar i Shoqatës së Transportit Publik, u shpreh se biletat e autobusëve nën kosto dhe mungesa e financimit ishin ndër faktorët kryesorë që pengojnë investimet në një flotë më moderne.

“Biletat janë nën kosto që prej vitit 2016, ndërkohë që çdo kosto tjetër e jetesës është rritur,” u shpreh kreu i Shoqatës së Transportit Publik.

Përfaqësues të Bashkisë së Tiranës u shprehën se, përtej nevojës për rinovimin e flotës, ulja e trafikut, si një prej ndotësve kryesorë në vend, është thelbësore për përmirësimin e sistemit të transportit.

Anjeza Asameni, nga Drejtoria e Përgjithshme e Mjedisit dhe e Zhvillimit të Qëndrueshëm pranë Bashkisë së Tiranës, theksoi se një prej sfidave kryesore të identifikuara prej tyre, përveç flotës së vjetëruar, është edhe trafiku, si ndotësi kryesor në kryeqytet.

“Bashkia e Tiranës është duke punuar për krijimin e disa hapësirave parkimi në periferi, në mënyrë që ata që hyjnë në Tiranë nga rrethet të mos detyrohen të parkojnë domosdoshmërisht në qendër, duke krijuar kështu mundësi për lehtësimin e trafikut dhe përmirësimin e transportit,” tha Asameni.