U bllokuan në det nga moti i keq në Himarë, Policia Kufitare shpëton çiftin nga Tirana

Moti i përkeqësuar që ka përfshirë jugun e vendit, kryesisht me erë të fortë, ka krijuar dhe rrezik mbytjeje në det. Policia kufitare e qarkut të Vlorës, por dhe Himarës, ka kërkuar sensibilizim për të gjithë turistët që mos të dalin në det me mjete lundruese, kryesisht të vogla, pasi rrezikohen.

Mesditën e sotme ka pasur shumë raste që kanë kërkuar ndihmë turistë të ndryshëm që kishin dalë në det me mjete lundruese, ku çifti nga Tirana kërkuan ndihmë pasi dallgët e larta, por dhe era e fortë, i kishte spostuar larg bregut, gati 3-4 km larg, dhe rrezikonin mbytjen.

Policia kufitare u ka shkuar në ndihmë çiftit duke i rimorkiuar dhe nxjerrë në breg shëndoshë e mirë, por për shkak të detit me dallgë dhe erës së fortë punonjësit e policisë kufitare në Himarë kanë rrezikuar edhe ata jetën. Ndërkohë që ka pasur dhe raste të tjera që kanë kërkuar ndihmë përgjatë vijës bregdetare të Himarës.