VIDEO/ Përplasje mes dy trenave pranë Bedfordit në Britani, raportohen të plagosur

Dy trena pasagjerësh janë përplasur pasditen e së premtes pranë Bedfordit, në Anglinë qendrore, duke shkaktuar  disa persona të plagosur.

Sipas mediave britanike, aksidenti ndodhi rreth orës 17:15 me kohën lokale dhe përfshiu dy trena të kompanisë East Midlands Railway.

Raportet fillestare flasin për lëndime serioze, ndërsa shërbimet e emergjencës, përfshirë ambulanca ajrore dhe policinë, u dërguan menjëherë në vendngjarje.

Pamje të publikuara në rrjetet sociale dhe të cituara nga mediat britanike tregojnë pasagjerë të shtrirë në dyshemetë e vagonëve. Megjithatë, autoritetet nuk kanë konfirmuar ende numrin e saktë të të lënduarve apo shkallën e plagëve të tyre.

Sipas informacioneve paraprake, njëri prej trenave dyshohet se është përplasur me trenin tjetër nga pas në jug të stacionit të Bedfordit. Shkaqet e aksidentit mbeten të paqarta dhe pritet të hetohen nga autoritetet hekurudhore britanike.

Për shkak të incidentit, trafiku hekurudhor në zonë është ndërprerë, ndërsa operatorët hekurudhorë u kanë kërkuar udhëtarëve të shtyjnë udhëtimet e tyre deri në një njoftim të ri.

WATCH: Footage from Bedford, England after 2 trains collide pic.twitter.com/BmfMORBob5

— Rapid Report (@RapidReport2025) June 19, 2026