Varshavë, alarm në aeroport për shkak të kërcënimit me bombë, avioni bën ulje emergjente

Aeroporti Modlin i Varshavës u mbyll deri në njoftim të mëtejshëm të martën në mëngjes pas uljes emergjente të një avioni polak që vinte nga Londra, për shkak të informacionit në lidhje me ekzistencën e një pajisjeje shpërthyese në aeroplan, siç u njoftua nga aeroporti.

Aeroplani Boeing 737 Max , i operuar nga linja ajrore polake LOT, u ul në orën 10:01 të mëngjesit sipas orës lokale. Pasagjerët dhe ekuipazhi zbritën shëndoshë e mirë, tha aeroporti në një postim në Facebook. Në bord ishin gjithsej 181 persona.

Shërbimet e sigurisë po hetojnë aktualisht kërcënimin e raportuar, shtoi deklarata.

Aeroplani, në pronësi të LOT, ishte ngritur nga Aeroporti Heathrow i Londrës, më i madhi në Evropë, dhe pritej të ulej në aeroportin kryesor ndërkombëtar të Polonisë, Varshavë Chopin, tha një zëdhënës i linjës ajrore.

Ende nuk dihet se nga ka ardhur informacioni për një pajisje shpërthyese.

Modlin është një aeroport ndërkombëtar dytësor i dedikuar kryesisht për transportuesit me kosto të ulët, pasi përdoret shumë nga linja ajrore si Ryanair. Ka një trafik pasagjerësh prej rreth 3.4 milionë në vit.

Ndodhet rreth 40 kilometra në veri të Varshavës dhe është i dyti më i madh nga tre aeroportet në kryeqytetin polak.

Lajme të Sugjeruara