Vizitat reciproke të krerëve të Kinës dhe SHBA-së brenda gjashtë muajve, shënojnë një moment historik

Të hënën, zëdhënësi i Ministrisë së Jashtme të Kinës, Guo Jiakun, drejtoi një konferencë të rregullt për shtyp.

Në përgjigje të një pyetjeje lidhur me njoftimin për vizitën e ardhshme shtetërore të Presidentit Xi Jinping në Shtetet e Bashkuara, Guo prezantoi detajet kryesore të vizitës dhe pritshmëritë e Kinës për zhvillimin e marrëdhënieve kino-amerikane.

Guo Jiakun deklaroi se, me ftesë të Presidentit amerikan Donald Trump, Presidenti Xi Jinping do të zhvillojë së shpejti një vizitë shtetërore në Shtetet e Bashkuara. Gjatë vizitës, Presidenti Xi do të zhvillojë shkëmbime të thelluara pikëpamjesh me Presidentin Trump mbi çështje madhore që lidhen me marrëdhëniet kino-amerikane, si dhe me paqen dhe zhvillimin global.

Diplomacia në nivel krerësh shteti luan një rol të pazëvendësueshëm në ofrimin e udhëzimeve strategjike për marrëdhëniet kino-amerikane. Realizimi i vizitave reciproke midis krerëve të shtetit të Kinës dhe SHBA-së brenda një periudhe gjashtëmujore, ka një rëndësi historike dhe shënon një moment kyç.

Kina është e gatshme të bashkëpunojë me SHBA-në për të pasuruar përmbajtjen e stabilitetit strategjik konstruktiv në marrëdhëniet dypalëshe, për të forcuar dialogun dhe bashkëpunimin, për të menaxhuar siç duhet dallimet, për të përmirësuar vazhdimisht mirëqenien e të dy popujve dhe për të nxitur paqen, stabilitetin dhe prosperitetin global.