Vjeshta e Kolonjës frymëzon 45 piktorë nga trevat shqiptare, rikthehet “Kolonia e Piktorëve”
Ka nisur edicioni i tetë i aktivitetit “Kolonia e Piktorëve” në Kolonjë, ku rreth 45 artistë nga Shqipëria, Kosova dhe trevat e tjera shqiptare janë bërë pjesë e këtij aktiviteti. Përgjatë katër ditëve, ata do të hedhin në telajo bukuritë natyrore të krahinës, me fokus të veçantë peizazhet e vjeshtës.
Fatmir Toçi, organizator i aktivitetit, thotë se në bashkëpunim me Bashkinë e Kolonjës po punohet për krijimin e një galerie arti në Ersekë, ku do të ekspozohen punimet e artistëve pjesëmarrës.
“Rreth 45 piktorë çdo vit në stinën e vjeshtës vijnë të marrin frymëzimin dhe transformimin që zona ka pasur. Do të shkojmë deri në fund të premtimit që kanë dhënë piktorët nga Shqipëria, Kosova, Maqedonia e Veriut, Mali i Zi, nga diaspora, që me pikturat e tyre brenda pak kohësh të krijohet një galeri arti e pikturës, ku do të ketë objekt dhe fokus peizazhet dhe pamjet e zonës”, tha Fatmir Toçi.
Për artistët, Kolonja është një burim frymëzimi në çdo stinë. Disa prej tyre tregojnë se kanë krijuar një lidhje të veçantë me këtë krahinë, të cilën e vizitojnë vazhdimisht për të pikturuar peizazhet e saj.
“Kolonia është hera e tretë, por unë vij shpesh sepse është nga rrugët e preferuara të miat. Nga rrugët më të bukura që ka Shqipëria për t’u pikturuar”, tha Arben Kristani.
“Vij për të disatën herë, për mua është kënaqësi e veçantë në Ersekë sepse edhe në këtë kohë ka natyrë të butë, kolorit të pasur, tonalitete të bukura e ka kënaqësi kur pikturon. Vjeshta është më e bukura këtu. Ngjyra të hatashme”, tha Emiona Stasi.
“Në koloninë e Ersekës, në peizazh që të ofron ky vend. Shumë bukur edhe pse koha e vrenjtur, natyra është fantastike, vjeshta e bukur”, tha Ardian Mashi.
Në përfundim të aktivitetit, krijimet e realizuara gjatë katër ditëve do të prezantohen në një ekspozitë në Ersekë. Ato synohet të bëhen pjesë e fondit të galerisë së ardhshme të arteve pamore, duke promovuar përmes artit bukuritë e Kolonjës.
Lajme të Sugjeruara
