Vritet me thikë një 47-vjeçar në Dragash të Prizrenit, autori në arrati

Një person ka humbur jetën mbrëmjen e së hënës në fshatin Zlipotok të Dragashit, Prizren pas një rrahjeje mes disa personave.

Sipas policisë, viktima dyshohet se paraprakisht ka pësuar lëndime nga një mjet i mprehtë.

Ai është dërguar për trajtim mjekësor në Qendrën Kryesore të Mjekësisë Familjare (QKMF) në Dragash, ku mjeku roje ka konstatuar vdekjen e tij. Viktima dyshohet se ishte imam në këtë komunë.

“Pas arritjes së ekipit mjekësor nga QKMF Dragash, mjeku kujdestar ka konstatuar vdekjen e viktimës, G.T., mashkull rreth 47-vjeçar nga Zlipotoku i Dragashit”, thuhet në një raport të policisë që e ka para KosovaPress.

I dyshuari, gjithnjë sipas forcave të rendit, është identifikuar si B.H., mashkull 40-vjeçar nga Zlipotoku. Prej mbrëmjes së të hënës policia është duke ndërmarrë veprime intensive për lokalizimin dhe arrestimin e tij. Në vendin e ngjarjes kanë dalë njësitet relevante të Stacionit Policor në Dragash, komandanti i stacionit, si dhe është njoftuar Njësia Rajonale e Hetimeve në Prizren, të cilës më vonë i janë bashkuar edhe njësi të tjera policore. Hetimet janë duke u zhvilluar në koordinim me prokurorin e shtetit ndërsa rasti është iniciuar si “Vrasje e rëndë”.

Hetimet për zbardhjen e plotë të rastit janë duke vazhduar.