“Zgjohet” Spiropali: Shqipërisë i duhet një marrëveshje e re politike dhe institucionale

Deputetja e Partisë Socialiste, Elisa Spiropali, ka prezantuar një vizion politik dhe institucional që e ka quajtur “Një marrëveshje e re për Shqipërinë”, duke vënë theksin te forcimi i shtetit të së drejtës, kufizimi i pushtetit dhe rritja e kontrollit institucional.

Në një fjalim të gjatë me fokus politik dhe shoqëror, Spiropali u ndal te nevoja për një ekuilibër më të fortë mes pushtetit dhe institucioneve mbikëqyrëse, duke theksuar se demokracia dobësohet kur kontrolli mbi pushtetin mbetet pas zhvillimit të tij.

Ajo deklaroi se Shqipëria ka hyrë në një fazë të re zhvillimi, ku sfida kryesore nuk është më ndërtimi i institucioneve, por funksionimi i tyre dhe vendosja e kufijve të qartë ndaj pushtetit ekzekutiv.

Spiropali vuri theksin edhe te roli i parlamentit, duke e cilësuar atë si një hapësirë që duhet të përfaqësojë dhe dëgjojë më shumë qytetarët, si dhe te rëndësia e një opozite funksionale në një sistem demokratik.

Në fjalimin e saj u përmend gjithashtu nevoja për reforma në sistemin zgjedhor, forcimin e lirisë së medias dhe krijimin e një ekonomie të bazuar në meritë dhe inovacion, duke reduktuar ndikimin e lidhjeve me pushtetin në aktivitetin ekonomik.

Një tjetër fokus ishte edhe lufta kundër korrupsionit, të cilin ajo e përshkroi si një fenomen kulturor dhe institucional që kërkon përballje të vazhdueshme, jo vetëm në nivel ligjor, por edhe në mënyrën e funksionimit të shtetit.

Në përfundim, Spiropali theksoi se orientimi europian i Shqipërisë nuk matet vetëm me deklarata politike, por me aftësinë e shtetit për të garantuar të drejta, siguri dhe barazi për qytetarët e tij.