Zhupa: Fermerët e Delvinës përballen me zjarre, përmbytje dhe keqmenaxhim shtetëror
TIRANË, 2 dhjetor/ATSH/ Deputetja e Partisë Demokratike, Ina Zhupa deklaroi sot se zonat e Delvinës, që gjatë verës u përfshinë nga zjarret dhe tani janë përmbytur, vuajnë nga mungesa e gatishmërisë dhe mbështetjes nga shteti.
Në fjalën e saj në seancën plenare të Kuvendit, Zhupa ngriti akuza për keqmenaxhim dhe korrupsion, duke sjellë shembullin e rrëzimit të urës së Metoqit, ndërtuar vetëm 3 vjet më parë, si rezultat i investimeve joefektive.
Ajo tha se këto fatkeqësi natyrore janë edhe fatkeqësi politike, duke u shndërruar në pasoja të drejtpërdrejta për banorët dhe fermerët e zonës.
Deputetja gjithashtu vuri në dukje mungesën e kontrollit të tregut nga institucionet.
Zhupa tha se AKU deklaroi se janë 700 tonë mandarina të kontaminuara me pesticide, por sipas saj nuk flet me emra konkretë se kush i tregtoi këto mandarina. Kjo mungesë qartësie, sipas saj, dëmton jo vetëm konsumatorin, por edhe fermerin e ndershëm.
“Ky është dëm i jashtëzakonshëm që bën papërgjegjshmëria e institucioneve shqiptare. Institucionet duhet të dalin me emra, duhet të marrin masa dhe t’i kapin në kohë, edhe për të mbrojtur konsumatorin dhe fermerin e ndershëm”, deklaroi ajo.
Zhupa theksoi se banorët e Delvinës ende nuk kanë marrë dëmshpërblimet nga zjarret e verës.
“Imagjino, kur do të marrin dëmshpërblimin për përmbytjet. Këtu mbivendosen ngjarjet dhe vetëm një gjë nuk kanë kurrë, vëmendjen dhe paratë e shtetit”, tha ajo.
/r.e/a.f/