145 njerëz shpohen me shiringa në festivalin e muzikës së rrugës në Francë, në pranga 12 persona

Policia franceze ka ndaluar 12 persona, pasi 145 individë raportuan se ishin shpuar me shiringa gjatë një festivali mbarëkombëtar të muzikës së rrugës, sipas ministrisë së brendshme të Francës. Sulmet ndodhën në të gjithë Francën, me policinë e Parisit që konfirmoi të paktën 13 raste në kryeqytet.

Sipas ministrisë së brendshme, sulmuesit përdorin shiringa për të injektuar viktimat zakonisht në krah, këmbë ose vithe me ilaçe si Rohypnol ose GHB, të cilat mund t’i lënë individët të çorientuar, të pavetëdijshëm dhe të prekshëm ndaj sulmeve dhe përdhunimeve.

“Ministria po e merr këtë shumë seriozisht. Testet toksikologjike po bëhen dhe hetimi është në vazhdim”, tha një zëdhënëse nga ministria e brendshme.

Miliona njerëz dolën në rrugë gjatë fundjavës për festën mbarëkombëtare “Fête de la Musique”, ndërsa zyrtarët i përshkruan turmat në Paris si “të paprecedenta”.

Laurent Nunez, shefi i policisë së Parisit, tha se kishte tre deri në katër herë më shumë njerëz në Paris sesa normalisht. Para festivalit, influencuesit feministë si Abrege Soeur paralajmëruan se ishin bërë thirrje në mediat sociale që gratë të shënjestrohen me shiringa. “Këto janë incidente jashtëzakonisht serioze,” tha Nunez./ CNN

/rtsh.al/