“Hakmarrësit” nisen furishëm

Megaspektakli filmik "The Avengers" (Hakmarrësit) filloi të shfaqet fundjavën e kaluar nëpër kinematë amerikane. Sikurse edhe pritej, filmi menjëherë u shndërrua në hit të vërtetë.

Në fakt, prej kësaj të hëne filmi "The Avengers" është pronar i titullit të filmit më të suksesshëm debutues të të gjitha kohërave, me një fitim prej 200 milionë dollarësh për vetëm një fundjavë shfaqjeje.

Filmi “The Avengers” tejkaloi rekorderin e deritanishëm, vazhdimin e fundit të sagës për Harry Potter, i cili vitin e kaluar kishte arritur që të fitonte plotë 169 milionë dollarë në fundjavën e parë të shfaqjes nëpër kinema amerikane.

Nëse kësaj i shtohet edhe fitimi i filmit që u realizua nëpër kinematë ndërkombëtare, atëherë del se filmi gjithsejtë fitoi 640 milionë dollarë nga shfaqja njëjavore e tij, e kjo shifër është më tepër sesa që dy vazhdimet e filmit “Iron Man” (585 dhe 623 milionë), “Thor” (449 milionë) dhe “Captain America” (368 milionë) arritën të fitonin gjatë gjithë kohës së shfaqjes së tyre nëpër kinema.