15 nëntori, afati përfundimtar për asgjësimin e fletëve të votimit. Rama: Mos guxoni

Kryetari i Partisë Socialiste, Edi Rama, bëri të ditur në një konferencë për shtyp se, në rast se do të asgjësohen fletët e votimit nga Komisioni Qendror i Zgjedhjeve, do jetë dhunim i hapur i opozitës.

Rama e bëri këtë koment, pasi në shtyp pati deklarime se fletët e votimit mund të asgjësohen, për shkak se këtë e parashikon Kodi Zgjedhor.

"I bëj apel Sali Berishës të kuptojë se shurdhëria ndaj kërkesave tona legjitime për të normalizuar jetën parlamentare të vendit vetëm po e rëndon e do të rëndojë edhe më shumë përgjegjësinë e tij. Të shtunën pasdite, më 10 tetor, populli opozitar do t'ia bëjë këtë apel kryeministrit pa legjitimitet edhe përpara zyrës së tij.

I bëj apel Sali Berishës të kuptojë se Partia Socialiste nuk hyn në parlament pa u plotësuar kërkesa e patjetërsueshme për transparencën e zgjedhjeve të 28 qershorit dhe me të gjithë opozitën ne do të përshkallëzojmë manifestimin e protestës për shkeljen e ligjit që garanton hapjen e kutive të votimit. Manifestimi opozitar i të shtunës, 10 tetorit, është vetëm fillimi i një përpjekjeje që ne do ta shtrijmë, në çdo rrugë të vendit, në qoftë se pushteti i lindur nga grabitja e votave nuk hap kutitë e 28 qershorit.

I bëj apel Sali Berishës të kuptojë se prekja e kutive të votimit apo, largqoftë për të e për ushtarin e tij fanatik në krye të KQZ, asgjësimi i kutive, ndërkohë që ne kërkojmë hapjen e tyre, jo vetëm që nuk do ta shpëtojë këtë pushtet të korruptuar e korruptues nga përballja me të vërtetën e popullit opozitar, por përkundrazi do të konsiderohet prej nesh si një shprehje e patolerueshme e dhunës ndaj opozitës", - tha Rama.

Kryetari i PS tha dje se nuk është opozita që po pengon heqjen e vizave, por vetë qeveria e Berishës.

"Sali Berisha duhet të japë llogari pse nuk u fut Shqipëria në grupin e këtyre vendeve, gjë e vendosur shumë më parë se opozita vendosi të mos hynte në Kuvend për shkak të grabitjes së votave. Dhe këtë llogari do ia kërkojmë ne që të gjithë edhe të shtunën pasdite më 10 tetor përpara zyrës së tij.

I bëj apel Sali Berishës të kuptojë se asgjë nuk e ndal opozitën në rrugën e saj për të çliruar zgjedhjet nga zgjedha e shtetit të bërë njësh me pushtetin dhe për t'i dhënë fund një historie të turpshme zgjedhjesh të deformuara e kontestuara, duke bërë çdo përpjekje e përballuar çdo vështirësi, në një betejë që nuk është beteja e radhës mes një pale e një pale tjetër, po beteja qytetare e një populli që jeton në mes të Evropës dhe nuk ka arsye në botë që të mos bëjë zgjedhje njësoj si kudo në Evropën ku jeton", - tha Rama.

Drejtuesi i socialistëve tha se protesta e ditës së shtunë bëhet për Shqipërinë e të gjithëve, jo për Shqipërinë e Berishës, Nanos dhe Metës.

"Të shtunën pasdite, 10 tetor, kjo betejë qytetare hyn në një fazë të re dhe ne do të jemi në krye të saj, sepse përfaqësojmë shpresën, nevojën, bindjen e palëkundur që pa i dhënë fund historisë së dhunës mbi votën e qytetarit shqiptar, pa rivendosur barazinë para ligjit dhe pa çliruar çdo qytetar nga hija e hakmarrjes politike të pushtetit të radhës, nuk ka Shqipëri evropiane për të gjithë. Ne na intereson Shqipëria evropiane për të gjithë dhe jo Shqipëria evropiane për Sali Berishën, Ilir Metën, Fatos Nanon dhe për kompaninë e tyre, bashkë me oborret e tyre, klanore dhe familjare", - tha Rama.

15 nëntori, afati përfundimtar për asgjësimin e fletëve të votimit

15 nëntori është dhe afati fundit kur fletët e votimit të shpallura të pavlefshme ose të panumëruara do të qëndrojnë në kuti. Zgjedhjet e pjesshme lokale të kësaj date detyrojnë KQZ të vendosë për djegien e fletëve të votimit duke lënë në Arkivin Shtetëror vetëm procesverbalet me rezultatet e çdo qendre votimit.

Arsyeja e asgjësimit është boshatisja e kutive që do të ripërdoren për zgjedhjet lokale në komunat Klos, Fushë-Arrës, Fierzë dhe njësinë bashkiake nr. 10 në kryeqytet.

Në kohën kur debati ndërmjet mazhorancës dhe Partisë Socialiste bëhet për hapjen e kutive për rinumërim, neni 178 i Kodit Zgjedhor sanksionon se menjëherë pas përfundimit të ankimeve, Komisioni i Zgjedhjeve mund t'i asgjësojë ato.

I kontaktuar nga ALSAT, kreu i këtij institucioni, Arben Ristani, pohon se fletët do shkatërrohen në limitet kohore të mundshme, por kutitë duhet të jenë bosh në datën 15 nëntor.

Në ligjet e mëparshme zgjedhore, të 2006 dhe të 2007, ishte e përcaktuar se "fletët e votimit digjeshin pas një viti ose pas tre muajsh", tani kjo çështje i është lënë në dorë të lirë të vetë KQZ.

Ndërsa për djegien e fletëve të votimit s'ka një afat kohor për procesverbalet e kutive të votimit dhe dokumentacionet e tjera parashikohet një procedurë e veçantë që zgjat deri në 2 vite gjithsej

Ndërkohë, kutitë me 1.519.176 fletë votimi të vlefshme gjenden prej kohësh në magazinat shtetërore qeveritare në Lundër.