40-vjeçari dhunoi dhe kërcënoi bashkëshorten me armë zjarri, parandalohet krimi në familje në Kamëz

Tiranë – Një ngjarje e rëndë familjare është parandaluar në kohë nga Policia, falë ndërhyrjes së shpejtë dhe veprimeve profesionale të strukturave të specializuara. Një 40-vjeçar është arrestuar në flagrancë në Kamëz, pasi dhunoi fizikisht bashkëshorten dhe e kanosi atë me armë zjarri.

Operacioni policor i koduar “Reagimi” u zhvillua nga shërbimet e Sektorit të Krimeve të Rënda, në bashkëpunim me Komisariatin e Policisë Nr. 5 dhe Forcën e Posaçme “Shqiponja”, pas marrjes së njoftimit për dhunën dhe kërcënimet ndaj gruas së tij.

I arrestuari është shtetasi A. M., 40 vjeç, banues në Kamëz. Gjatë kontrollit të ushtruar në banesën e tij, Policia gjeti dhe sekuestroi një armë zjarri pistoletë dhe një sasi municioni luftarak, që dyshohet se ishin përdorur për të kërcënuar bashkëshorten.

Materialet procedurale i janë referuar Prokurorisë për veprime të mëtejshme ligjore. Policia bën apel për denoncimin e çdo rasti dhune në familje, duke garantuar mbrojtje dhe reagim të menjëhershëm.