46 piromanë të arrestuar, 91 të tjerë janë nën hetim që nga data 14 qershor

46 persona kanë përfunduar pas hekurave si autorë të dyshuar të zjarrvënieve nëpër të gjithë vendin. 91 të tjerë janë proceduar penalisht në gjendje të lirë.

Fjala është për periudhën nga 14 qershori deri në 14 gusht, ku zjarret kanë përpirë anembanë vendin.

Këto imazhe tregojnë shkrumbimet e masiveve pyjore, të kullotave, kafshëve që banonin në zonë, dëme katastrofike që i kanë kushtuar kosto të pallogaritshme florës e faunës.

Policia e shtetit njofton se janë djegur prona private e në shumë raste, është rrezikuar seriozisht jeta e banorëve, ajo e punonjësve të Policisë, zjarrfikësve dhe Emergjencave Civile.

Autoritetet i bëjnë apel të gjithë blegtorëve dhe fermerëve që janë përgjegjës për tokat dhe kullotat që kanë në pronësi apo në përdorim të mos ndezin kurrsesi zjarr qoftë për djegien e mbetjeve të prodhimeve bujqësore apo edhe për pastrimin e territorit pa njoftuar dhe konsultuar me instancat përgjegjëse

NJOFTIMI:

Strukturat e Policisë së Shtetit në të gjithë vendin, përgjatë muajve qershor, korrik dhe deri sot, janë angazhuar maksimalisht për identifikimin, kapjen dhe arrestimin e autorëve të zjarrvënieve.

Prej qershorit deri më datë 14 gusht, strukturat e Policisë kanë identifikuar 137 autorë të zjarrvënieve, nga të cilët 46 janë arrestuar, ndërsa 91 janë proceduar penalisht.

Ndërkohë, Forcat Kombëtare të Sigurisë, Forcat e Posaçme “Shqiponja”, Patrullat e Përgjithshme dhe Forcat Operacionale, në drejtimin e drejtuesve të qarqeve dhe të Drejtorisë së Përgjithshme të Policisë së Shtetit, vijojnë të jenë në terren, duke ndihmuar në evakuimin e banorëve dhe duke mbështetur Emergjencat Civile dhe zjarrfikësit, për shuarjen e flakëve.

Strukturat operacionale të Policisë së Shtetit po kontrollojnë dhe monitorojnë zonat me dronë, për të identifikuar në kohë personat që shkaktojnë zjarr, duke djegur pronën private, banesa, pyje, kullota dhe, në shumë raste, duke rrezikuar seriozisht jetën e banorëve, punonjësve të Policisë, zjarrfikësve dhe Emergjencave Civile.

Policia e Shtetit apelon për të gjithë banorët që të mos shkaktojnë zjarre. Blegtorët dhe fermerët janë përgjegjës për tokat dhe kullotat që kanë në pronësi apo në përdorim.

Thirrje për të gjithë banorët: mos ndizni zjarr për djegien e mbetjeve të prodhimeve bujqësore apo për pastrimin e territorit, pa njoftuar dhe marrë masa me instancat përgjegjëse.

Shkaktimi i zjarrit, me qëllim apo nga pakujdesia, është vepër penale dhe Policia e Shtetit po punon, në bashkëpunim me banorët, për identifikimin, kapjen dhe arrestimin e të gjithë atyre që shkaktojnë zjarre.

/vizionplus.tv