89 milionë euro për barazinë gjinore, tregu i punës më i mundur për gratë

Të jesh i barabartë në shoqëri do të thotë të sigurohesh që politikat për këtë të financohen.

Vetëm për vitin 2025 janë parashikuar 89 miliardë lekë për mbështetjen e politikave me bazë gjinore.

Organizata e Kombeve të Bashkuara për Gratë (UN Women) në Shqipëri e konsideron sukses buxhetimin gjinor në procesin e hartimit të projektbuxhetit.

Planifikimi ka bërë që 77 programe të kenë financim për të përfshirë edhe barazinë gjinore në zbatimin e tyre, nga 38 që ishin në vitin 2019.

“Kur puna ka filluar me qeverinë e Shqipërisë, 1 për qind e financave qendrore kishin elemente të barazisë gjinore. Në këto dhjetë vite, 10,8 për qind e planifikimeve buxhetore integrojnë elemente të buxhetimit gjinor. Shqipëria, përmes sistemit të financave që ka, konsiderohet një vend lider në rajon, por edhe në Evropë, për gjurmimin e buxhetimit të përgjithshëm gjinor,” thotë Erisa Çela, drejtuese e programeve të UN Women.

Financimi është i rëndësishëm edhe për sa i përket sektorëve të përzgjedhur.

“Sektorët kryesorë janë ai i mbrojtjes sociale dhe i shëndetësisë. Te këta sektorë kemi 12,5 për qind të gjithë buxhetit,” shprehet drejtuesja.

Apeli i zyrës së OKB-së për Gratë në Shqipëri është që vëmendja të shtrihet te financimi i ekonomisë së shërbimeve, të cilat lejojnë gratë të çlirohen nga shërbimi në familje.

“Nëse ne nuk investojmë në infrastrukturë në transport, në kopshte dhe çerdhe në mënyrë që jeta e tyre të lehtësohet dhe të kenë akses në tregun e punës, atëherë kemi dështuar në gjysmën e popullatës, mbështetjes që atyre duhet t’u japim dhe aksesit që ato duhet të kenë në tregun e punës,” thekson znj. Çela.

Gazetare: Entela Komnino

/rtsh.al/