ARRSH: Intensiteti i reshjeve në rënie, akset rrugore të hapura

Autoriteti Rrugor Shqiptar (ARRSH) bëri me dije se gjatë natës intensiteti i reshjeve ka pësuar ulje në të gjithë vendin, ndërsa kontraktorët kanë vijuar punën për pastrimin e akseve rrugore nga rënia e gurëve dhe inerteve.

Sipas njoftimit, probleme janë shfaqur në disa segmente si Tropojë–Bajram Curri–Valbonë, Bajram Curri–Fierzë, Sopot–Kam, Dushaj–Lekbibaj, Kukës–Ura e Zapotit–Shishtavec, Kukës–Krumë, Pukë–Fushë Arrëz–Fushë Dukagjin, Skurraj–Peshkopi dhe Elbasan–Qafë Thanë, por pas ndërhyrjes rrugët janë hapur për qarkullim.

ARRSH bëri me dije gjithashtu se vazhdon prezenca e ujit në disa segmente të tjera të rëndësishme, si Laç–Ura e Drojes, Qafë Gjashtë–Shën Vasil, Krane–Syri i Kaltër dhe Tepelenë–Shtëpez.

Në aksin Maliq–Lozhan, në km 13, në zonën e Moglicës, është raportuar rënie gurësh dhe aluvionesh që shkaktuan bllokimin e rrugës. Autoriteti bëri me dije se ndërhyrja u krye menjëherë dhe rruga është rikthyer në normalitet.

Aktualisht, sipas ARRSH, të gjitha akset nacionale janë të hapura për qarkullimin e mjeteve, ndërsa monitorimi i situatës vijon për të garantuar sigurinë e udhëtarëve.

/rtsh.al/