AZHBR publikon listën e aplikantëve të kualifikuar

Agjencia e Zhvillimit Bujqësor dhe Rural (AZHBR) publikoi të premten  listën e aplikimeve të kualifikuara nga Skema Kombëtare e Mbështetjes në Bujqësi dhe Zhvillim Rural 2022.

Sipas AZHBR-së, 5164 fermerë janë kualifikuar në gjashtë masat mbështetëse ku përfshihen sektorët: fara fidanë; bimë mjekësore; ferma organike; certifikimi Global GAP; blegtori; bletari.

Në përputhje me udhëzimin e ministrisë së Bujqësisë dhe Zhvillimit Rural, listat janë të publikuara në faqen zyrtare të AZHBR ku gjendet edhe informacioni për plotësimin e dokumentacionit, që duhet të kryejnë aplikantët e kualifikuar.

AZHBR njofton se vija e financimit do të ulet në përputhje me buxhetin që Ministria e Bujqësisë dhe Zhvillimit Rural, si institucion përgjegjës për alokimin e buxhetit, do të akordojë për skemën mbështetëse në vijim.

Për çdo informacion të nevojshëm mbi aplikimet fermerët, mund të informohen pranë Agropikës më të afërt.

Skema Kombëtare e Mbështetjes në Bujqësi 2022, adreson një fondi prej 3,7 milionë lekë, subvensione për fermerët.

Rreth 60 mijë fermerë kanë aplikuar online në e-Albania për të qenë fitues në një prej 13 masave të financimit direkt që qeveria jep në mbështetje të fermerëve në bujqësi e blegtori.

Skema mbështetëse për fermerët 2022 u shtri në të gjithë vendin, në datat 24 shkurt deri më 30 mars 2022, ku fermerët aplikuan paralelisht edhe për skemën mbështetëse për naftë falas.