Afera e incineratorëve-Gjykata e Posaçme e Apelit rikthen për rigjykim çështjen e ish-deputetit Bllako
Gjykata e Posaçme e Apelit ka prishur vendimin e shkallës së parë ndaj ish-deputetit Alqi Bllako që e ka dënuar e 4 vite burg, duke e rikthyer çështjen për rigjykim, ku Bllako akuzohet për aferën e incineratorëve.
Pasi ka shqyrtuar ankimin e SPAK-ut dhe të Alqi Bllakos, apeli i Gjykatës së Posaçme dha vendimin duke urdhëruar që çështja të rikthehet për rigjykim në Shkallën e Parë nga një tjetër trupë gjykuese.
Në apelimin e vendimit të Shkallës së Parë, Alqi Bllako kishte kërkuar pafajësi me argumentin se posti i tij nuk futet tek zyrtarët e lartë dhe nuk mund të ngrihet akuzë e tillë.
Më 11 mars të këtij viti, Bllako u dënua me 4 vite burg nga Gjykata e Posaçme Antikorrupsion dënim i cili zbriti në 2 vite e 8 muaj për shkak të procedurës së gjykimit të shkurtuar dhe u gjet fajtor për kryerjen e veprës penale “korrupsion pasiv” në dy raste.
Më herët, Alqi Bllako është dënuar me vendim të formës së prerë edhe për inceneratorin e Elbasanit me 2 vite e 8 muaj burg, ndërsa për inceneratorin e Fierit çështja është rikthyer për rigjykim nga Gjykata e Posaçme e Apelit në atë atë shkallë së parë.
“Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Saida Dollani (kryesuese), Miliana Muça (anëtare) dhe Tereza Merkaj (anëtare), më datë 23.07.2025, shpalli vendimin lidhur me çështjen e regjistruar me nr. 50 akti, datë 17.06.2025 regjistrimi, mbi ankimin e paraqitur nga Prokuroria e Posaçme kundër Korrupsionit dhe Krimit të Organizuar dhe ankimin e paraqitur nga i pandehuri A.B., ndaj vendimit nr. 22, datë 11.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi:
Prishjen e vendimit nr. 22, datë 11.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar, duke u urdhëruar dërgimi i akteve për gjykim një kolegji tjetër të së njëjtës gjykatë”, thuhet në vendimin e Gjykatës së Posaçme të Apelit.
/rtsh.al/