Ahtisari, Ishinger Vizner, dhe të tjerë, vijnë në Kosovë
Kosova nuk do të jetë nikoqire e vetëm këtyre personalitete të larta të politikës dhe diplomacisë ndërkombëtare.
KosovaPress ka mësuar thuajse shumicën e emrave që do të jenë rreth datës 10 shtator në Kosovë.
Njeriu që publikoi propozimin e tij për statusin e Kosovës, ish presidenti finlandez Marti Ahtisari, sipas burimeve të KosovaPress, do të jetë në Kosovë në ditën e përfundimit të mbikëqyrjes së pavarësisë.
Mësohet se ai do të jetë në këtë ditë të veçantë për Kosovë jo i vetëm. Përkrahë tij do të jetë edhe ish-ndërmjetësi i Bashkimit Evropian për statusin e Kosovës, ambasadori Wolfgang Ischinger.
Po këto burime bëjnë të ditur se edhe ish-ndërmjetësi, ambasadori amerikan Frenk Vizner gjithashtu do të jetë në Kosovë.
Kësaj ceremonie nuk do t’i mungojë as ish presidenti amerikan, Bill Klinton, i cili edhe pse jo fizikisht, nëpërmjet një videolinku do të mbaj një fjalim.
Sa i përket të tjerëve, mësohet se prezentë do të jenë ministrat e Punëve të Jashtme të të gjitha shteteve të rajonit, përveç atyre që nuk e kanë njohur pavarësinë e Kosovës. Numri i tyre deri më tani mësohet të jetë rreth 10 ministra.
Ndërsa si mysafirë të Pieter Faith-it do të jenë rreth 30 delegacione me në krye drejtorët për Evropën.
Kjo është vetëm një pjesë e protokollit që është mësuar nga burime të KosovaPress-it. /kosovapress/