”Albanian ICT Academy” në Korçë – Nisin regjistrimet për të pasionuarit pas teknologjisë

Kanë nisur regjistrimet për kurset e reja të teknologjisë së informacionit për fëmijët dhe të rinjtë nga mosha 7 deri 18 vjeç, kjo falë një programi bashkëpunimi mes bashkisë së Korçës dhe Albanian ICT Academy. Edhe këtë vit bashkia Korçë do të mbështesë me masën 50% të vlerës së trajnimit të gjithë të pasionuarit pas teknologjisë.

“Janë rihapur përsëri thirrjet për regjistrim të fëmijëve për fëmijët nga 7-15 vjeç në programet e kodimit si robotik etj”, u shpreh Përgjegjësja e Inovacionit Bashkia Korçë,  Megi Koleci.

Duke qenë se teknologjia është kryefjala e ditëve të sotme, nga viti në vit është vënë re një rritje e interesit të fëmijëve dhe të rinjve për të ndjekur këto kurse.

Ky është viti i tretë që ky program mbështetës po zbatohet në kuadër të vizionit të bashkisë për kthimin e Korçës në një qendër të inovacionit dhe teknologjisë. Regjistrimet do të jenë të hapura deri në fund të javës. 

Gazetare Eftjola Fili

/RTSH/