Allen nuk heq dorë nga filmi

Që kur i hyri asaj aventure, pati thënë: “As vetë nuk e di se ç’po bëj”. Kjo ishte ndiesia që e shoqëroi edhe pas përfundimit të premierës, kur i “trembur” nuk doli të përshëndetej me publikun. Një fakt që nuk mbeti pa u komentuar nga të gjitha mediat botërore që ndoqën të parën regji opere, të realizuar nga regjisori Woody Allen. Prej datës 7 shtator, në një nga skenat më të mëdha operistike në Los Anxhelos, drejtuar nga tenori Placido Domingo, po shfaqet Triptiku i Giacomo Puccinit. Një prej tri episodeve është “Gianni Schichi”, të cilën e mori përsipër për ta vënë në skenë regjisori i njohur i kinemasë amerikane dhe botërore, 73-vjeçari, Woody Allen.

Allen duket se i ka qëndruar besnik dashurisë së vjetër, filmit. Sipas kritikës dhe shtypit të huaj, shfaqja të jepte përshtypjen e një filmi bardhë e zi, të viteve ’50. Regjisori ka luajtur me kontrastin dhe humorin. Duke iu përmbajtur qëllimit fillestar të vetë kompozitorit, varianti i Allenit ka shkulur gazit spektatorët, nga fillimi deri në fund. Kësaj ideje i ka shërbyer më së miri edhe loja e këngëtarëve, të transformuar në gangsterë e mafiozë me baseta të gjata. Për të interpretuar rolin e djaloshit të dashuruar, Runnucio, Alleni zgjodhi tenorin shqiptar, Saimir Pirgu, për të cilin ishte hera e parë që interpretonte në një skenë amerikane. Pirgu prej vitesh jeton në Itali, ndërsa interpreton në skenat më të mëdha operistike evropiane. Debutimi “amerikan” ndodhi pikërisht në përvjetorin e vdekjes së tenorit Luciano Pavarotti, që në një farë mënyre ishte kumbari i tij. “Nuk më duket sikur nuk është më mes nesh, pasi ende dëgjoj këshillat dhe zërin e tij tek më thoshte “Bravo bullafiq!”. Për mua është gjithnjë i pranishëm”, - është shprehur për gazetat italiane, tenori shqiptar, i cili është komentuar si një i ri plot talent. Duket se Pirgu është një djalë me fat, pasi emri i tij do të mbetet në histori, si tenori që ka luajtur në të parën opera të drejtuar nga Woody Allen.