Ancelotti, trajner i ri i Brazilit? Federata vendos një super rrogë në tavolinë

Carlo Ancelotti së shpejti mund të largohet nga Real Madrid për të udhëhequr kombëtaren braziliane. Pas eliminimit nga Liga e Kampionëve, pozicioni i tij është bërë gjithnjë e më i pasigurt dhe sipas Relevo, Federata Braziliane (CBF) po i afrohet nënshkrimit me trajnerin italian.

Propozimi thuhet se tashmë është dorëzuar, me një pagë të ngjashme me atë që ai merr aktualisht në Madrid, gati 10 milionë euro në vit, një shifër e jashtëzakonshme për një trajner. Kontrata do të jetë deri në Kupën e Botës 2026, me synimin e deklaruar për të rikthyer Brazilin në mesin e të mëdhenjve. Që nga triumfi i tyre në 2002, në fakt, Seleção ka arritur vetëm një gjysmëfinale, në vitin 2014, e cila përfundoi me një humbje historike 1-7 kundër Gjermanisë.

Sipas The Athletic, negociatat janë të avancuara dhe Ancelotti nuk dëshiron të humbasë mundësinë për të udhëhequr në një Botëror si trajner. Nëse marrëveshja arrihet në ditët në vijim, trajneri mund të largohet nga Real Madridi edhe para Kupës së Botës për Klube të planifikuar për në qershor, në mënyrë që të jetë në krye të ekipit kombëtar brazilian.