BBC artikull për dështimin e bisedimeve Kurti-Vuçiç: BE dhe Serbia paralajmëruan shpërthimin e dhunës në Kosovë

Pas dështimit të bisedimeve Prishtinë-Beograd për arritjen e një marrëveshje për targat serbe, BE dhe Serbia kanë paralajmëruar shpërthimin e një dhune në Kosovë. Kështu e nis artikullin BBC teksa shkruan se autoritetet kosovare duan që minoriteti etnik serb të dorëzojë targat e tyre të lëshuara nga Serbia, pasi kjo e fundit nuk e njeh pavarësinë e Kosovës.

Policia e Kosovës planifikon të vendosë gjoba prej 150 €, duke filluar nga e marta, për mbajtësit e targave të lëshuara nga Serbia. SHBA dëshiron që ky veprim të vonohet dhe ka kërkuar lëshime për të ruajtur paqen.

“Kosova argumenton se targat që i paraprinë luftës së territorit të vitit 1999 për pavarësi nga Serbia nuk mund të jenë më të vlefshme. Ai thotë se 50,000 serbët në veri të Kosovës, të cilët pranojnë vetëm institucionet lokale serbe, tani duhet të përdorin targat e Kosovës të lëshuara në Prishtinë”, thuhet në artikull.

Po ashtu në artikullin e BBC citohet edhe shefi i politikës së jashtme të BE-së Josep Borrell i cili tha se bisedimet shumëorëshe nuk kishin arritur të zgjidhin mosmarrëveshjen e gjatë. “Mendoj se ka një përgjegjësi të rëndësishme në anët e të dy liderëve për dështimin e bisedimeve sot dhe për çdo përshkallëzim dhe dhunë që mund të ndodhë”, tha ai.

Më vonë, Kurti fajësoi BE-në për dështimin e bisedimeve. Borrell tha se lideri i Kosovës kishte refuzuar një propozim kompromisi të BE-së, megjithëse Serbia e kishte pranuar atë. Vuçiç tha se Serbia do të ndalojë lëshimin dhe rinovimin e targave të veturave të veta për serbët në veri të Kosovës.

Zëdhënësi i Departamentit të Shtetit të SHBA Ned Price tha se të dyja palët “do të duhet të bëjnë lëshime për të siguruar që ne të mos rrezikojmë dekada të paqes së fituar me vështirësi në një rajon tashmë të brishtë”.

/rtsh.al/