BEOGRAD – Mijëra serbë protestojnë kundër qeverisë
BEOGRAD, 8 shtator /ATSH-ANSA/ – Mijëra serbë dolën përsëri në rrugët e Beogradit për të protestuar kundër presidentit, Aleksandar Vuçiç duke e akuzuar atë për korrupsion dhe sundim autokratik.
Protestuesit marshuan drejt ndërtesës kryesore qeveritare, Pallatit të Drejtësisë dhe disa ndërtesave të Ministrisë së Brendshme.
Zemërimi publik u intensifikua pas një goditjeje të dhunshme policore në qytetin verior të Novi Sadit.
”Oficerët përdorën gaz lotsjellës, granata zhurmuese dhe shkopinj kundër protestuesve paqësorë”, sipas raporteve të medias.
Trazirat u përshkallëzuan në Fakultetin e Filozofisë në Universitetin e Novi Sadit pasi dekani, me ndihmën e policisë, i detyroi studentët të braktisnin ndërtesën që kishin zënë për nëntë muaj.
Protestat, të cilat kanë vazhduar për më shumë se 10 muaj, u nxitën fillimisht nga shembja e një strehe në një stacion treni të rinovuar së fundmi në Novi Sad më 1 nëntor 2024, ku humbën jetën 16 persona.
Ekspertë të pavarur dhe figura të opozitës fajësojnë për katastrofën neglizhencën dhe korrupsionin e qeverisë Vuçiç./ /os/