BEOGRAD – Një burrë vritet pasi sulmon një roje jashtë ambasadës izraelite

BEOGRAD, 28 tetor /ATSH-DPA/ – Një polic serb mbeti i plagosur nga një sulm me thikë në orët e para të mëngjesit  përpara se të qëllonte për vdekje autorin e sulmit, bëri të ditur ministri i Brendshëm serb, Ivica Daçiç.

Sipas ministrit, ngjarja ndodhi pak pas mesnatës dhe po hetohet nga autoritetet si akt terrorist.

Polici përdori armën e shërbimit për vetëmbrojtje.

Autori ishte një i ri serb nga qyteti perëndimor i Shabacit, i cili, sipas Daçiçit, ishte i njohur për autoritetet si mbështetës i organizatës terroriste ”Shteti Islamik”.

Ministria e Jashtme e Izraelit konfirmoi incidentin, duke e cilësuar gjithashtu si një tentativë sulmi terrorist.

Sipas saj, asnjë pjesëtar i personelit diplomatik nuk u lëndua, ndërsa ambasada ishte e mbyllur në momentin e ngjarjes.

Një incident i ngjashëm ndodhi në qershor të vitit 2024, kur një shtetas serb i konvertuar në islam qëlloi një polic serb jashtë ambasadës izraelite në Beograd.

Polici reagoi duke qëlluar sulmuesin, i cili mbeti i vdekur.

Edhe efektivi u plagos dhe iu nënshtrua një ndërhyrjeje kirurgjikale. /Ad.Ab./ a.jor.