BERLIN – Gjermania kritikon deklaratën e ministrit izraelit për urinë në Gazë

BERLIN, 7 gusht /ATSH-DPA/- Ministria e Jashtme gjermane ka dënuar deklaratën e ministrit izraelit të Financave, Bezalel Smotrich, në të cilën ai shpreh keqardhjen për ndihmën për palestinezët në Rripin e Gazës – duke e përshkruar urinë si moralisht të justifikuar.

“Këto janë deklarata krejtësisht të papranueshme dhe skandaloze nga ministri izraelit i Financave. Ne i refuzojmë ato në termat më të fortë të mundshëm”, tha një zëdhënës i Ministrisë së Jashtme, në Berlin.

“Është një domosdoshmëri e njerëzimit dhe një parim bazë i së drejtës ndërkombëtare humanitare që civilët duhet të mbrohen në luftë – dhe të kenë akses në ujë dhe ushqim”, shtoi zëdhënësi.

Sipas raporteve të medias izraelite, Smotrich e përshkroi bllokadën e ndihmave për Gazën – derisa të gjithë pengjet e kapur në sulmet e 7 tetorit nga grupi militant palestinez Hamas të lirohen – si moralisht të justifikuar.

“Bllokada do të ishte e justifikuar edhe nëse do të sillte vdekjen e dy milionë njerëzve në Gazë, por komuniteti ndërkombëtar nuk do ta lejonte një masë të tillë”, tha Smotrich.

Zëdhënësi i Ministrisë së Jashtme gjermane tha se deklarata e ministrit izraelit do të “ndiqej nga afër” nga gjykatat ndërkombëtare të të drejtave në Hagë, ku Izraeli është përballur me akuza për gjenocid. //a.i/